இலங்கையில் பல பாகங்களில் வெடித்து சிதறும் எரிவாயு; அச்சத்தில் மக்கள்!

 

மட்டு. ஏறாவூரில் சமையலறையில் கேஸ் அடுப்பு ஒன்று வெடித்துள்ளதாக கூறப்படும் நிலையில்  , தெய்வாதீனமாக எவருக்கும் காயங்களோ சேதங்களோ ஏற்படவில்லை என தெரிவிக்கப்படுகின்றது.

 இந்தச் சம்பவம்,  ஏறாவூர், மிச்நகர் பகுதியில்இன்று நண்பகல் 12.15க்கு இடம்பெற்றுள்ளது. மௌலவி மஹ்மூதுலெப்பை நயீம் என்பவரின் வீட்டில் அவரது மனைவி சமையல் வேலைகளில் ஈடுபட்டு முடிந்ததும் கேஸ் சிலிண்டரை நிறுத்திவிட்டு, சமையலறையில் இருந்து வெளியே வந்தபோது கேஸ் அடுப்பு வெடித்துள்ளது.

இதன்போது கேஸ் அடுப்பு வெடித்துச் சிதறியுள்ளபோதிலும் தீ பற்றிக் கொள்ளவில்லை என்பதுடன், பொருள் சேதங்களோ காயங்களோ ஏற்படவில்லை என்றும் தெரிவிக்கப்படுகின்றது.

இதேவேளை  அண்மைய நாட்களாக இலங்கையின் பல பாகங்களிலும் எரிவாயு சிலிண்டகள் வெடிப்பு சம்பவங்கள் பதிவாகின்ற நிலையில், நேற்றைய தினம், யாழ்ப்பாணம், மற்றும் கிளிநொச்சி  உள்ளிட்ட பிரதேசங்களிலும்  வெடிப்பு சம்பவங்கள் பதிவாகியிருந்த நிலையில் குறித்த சம்பவங்கள் மக்கள் மத்தியில் பெரும் அச்சத்தினை தோற்றுவித்துள்ளது.